良久,終於有一把男聲開腔講話。
「大家,有無睇過果套戲,I am legend?」
剎那間,所有人都抬頭,看著聲音的來源;
是那個坐在窗邊,帶著眼鏡的青年;我認得他,他也是剛才第一個開聲的人。
所有人也看著他,可是沒人答話。
青年見大家沒反應,有點尷尬,唯有繼續自說自話的說下去。
「係一部末世片,講有條友起身,發覺其他人全部唔見哂,自己係果個城市入面最後一個生存既人……我覺得,有啲似我地宜家呢個情況…好似係。」
大家繼續沒反應,青年繼續自己打完場。
「反正就係最後,原來講話全地球都中左一隻毒,瀨哂野,講話90%死哂,之後果10%變左怪物,所以佢就係legend之類——」
聽到這裡,一個中年男人突然插話,他的語氣帶點威嚴:
「你係講緊,一陣會有怪物出黎襲擊我地?」
「唔係,我只係講個電影入面發生既野,同我地情況有少少相同…」 青年連忙搖頭揮手,畏首畏尾,一副怕被人挑戰的模樣。
「唔得,你呢個講法講唔通。」中年男人直接否定青年;
「你地頭先有無留意,其實由我地出左獅子山隧道之後,已經無哂車?
而最重要既係,我清楚記得,係我地出隧道之前,隔離線明明係有兩架私家車過左我地頭,而我地後面亦真係有架巴士一路追緊上黎;
只係,唔知做咩事,一出左獅子山隧道,呢d車就全部消失哂。」
全車沉默,聽中年男人發表偉論;
當然,這樣我早就留意到了,在這一刻,我很想給男人拍個肩膀,說原來我們都是「摩擦力很強」的同道中人。
中年男人繼續:
「換句話講,問題其實係由我地一出獅子山隧道既果一刻起,所有人先消失哂。你地玩電話果乍人,係唔係一出獅子山隧道就打唔到比人地?」
車上的人默默點頭,均覺有理;
「所以,你果套咩野legend行唔通。
明明上一秒鐘仲有車係旁邊,下一秒,過左個灣位已經消失哂,斷估唔會係咩病毒爆發引起既,
因為我唔相信有咩病毒可以係一秒鐘之內連車都可以消失埋,咁樣一啲都唔合理。」
中年男子的專家分析口吻,令青年的「legend理論」不攻自破,
青年自己聽後也覺有理,繼而向中年男子問:
「咁先生你覺得,究竟係發生咩事?
點解會無哂人,點解會無哂車? 佢地去哂邊? 點解打唔到比佢地!?」
面對青年的題目,中年男子似是早有準備,
慢條斯理的向紅van內的所有乘客,說了句:
「你地有無諗過,其實係我地係出獅子山隧道既果一刻,
架小巴發左生意外;我地,其實已經死哂?」