第37回　慘受刑高足枉投師　強借債闊毛私狎妓

按：陶玉甫出至李浣芳房間，當請高亞白、錢子剛入席。賓主三人，對酌清談；既無別客。又不叫局。李浣芳和准琵琶要唱，高亞白說：「勿必哉。」錢子剛道：「亞白哥喜歡聽大麴，唱仔只大麴罷。我替耐吹笛。」阿招呈上笛子。錢子剛吹，李浣芳唱。唱的是《小宴》中「天淡雲閑」兩段。高亞白偶然興發，接著也唱了《賞荷》中「坐對南薰」兩段。錢子剛問陶玉甫：「阿高興唱？」玉甫道：「我喉嚨勿好。我來吹，耐唱罷。」子剛授過笛子，唱《南浦》這出，竟將「無限別離情，兩月夫妻，一旦孤另」一套唱完。高亞白喝聲采。李浣芳乖覺，滿斟一大觥酒，奉勸亞自。亞白因陶玉甫沒甚心緒，這觥飲干，就擬吃飯。玉甫滿懷抱歉，復連勸三大觸始罷。

一會兒，席終客散。陶玉甫送出客堂，匆匆回內。高亞白仍與錢子剛並肩聯袂，同出了東興里。亞白在路問子剛道：「我倒勿懂，李漱芳俚個親生娘、兄弟、妹子，連搭仔陶玉甫，才蠻要好，無撥一樣勿稱心，為啥生到實概個病？」子剛未言先嘆道：「李漱芳個人末，勿該應吃把勢飯。親生娘勿好，開仔個堂子。俚無法子做個生意。就做仔玉甫一個人，要嫁撥來玉甫。倘然玉甫討去做小老母，漱芳倒無啥勿肯；碰著個玉甫，定歸要算是大老母，難末玉甫個叔伯、哥嫂、姨夫、娘舅幾花親眷，才匆許，說是討倌人做大老母，場面下匆來。漱芳曉得仔，為仔俚自家本底子勿情願做倌人，故歇做末賽過勿曾做，倒才說俚是個倌人，俚自家也阿好說『我匆是倌人』？實概一氣末，就氣出個病。」亞白亦為之啼噓。

兩人一面說，一面走，恰到了尚仁里口。高亞自別有所事，拱手分路。錢子剛獨行進弄，相近黃翠鳳家，只見前面一個倌人，手扶娘姨，步履蹣跚，循牆而走。子剛初不理會，及至門首，方看清是諸金花。金花叫聲」錢老爺」，即往後面黃二姐小房間里去。

子剛踅上樓來，黃珠鳳、黃金鳳爭相迎接，各叫「姐夫」，簇擁進房。黃翠鳳問：「諸金花囗？」子剛說：「來里下頭。」金鳳恐子剛有甚秘密事務，假做要看諸金花，摯了珠鳳走避下樓。

翠鳳和子剛坐談片刻，壁上掛鐘正敲三下。子剛知道羅子富每日必到，即欲興辭。翠鳳道：「故也再坐歇末哉，啥要緊嗄？」子剛躊躇間，適值珠鳳、金鳳跟著諸金花來見翠鳳。子剛便不再坐，告別竟去。

諸金花一見翠鳳，噙著一泡眼淚，顫巍巍的叫聲「阿姐」，說道：「我前幾日天就要來望望阿姐，一徑走勿動；今朝是定規要來哉。阿姐阿好救救我？」說著，鳴咽要哭。翠鳳摸不著頭腦，問道：「啥嗄？」金花自己撩起褲腳管給翠鳳看。兩隻腿膀，一條青，一條紫，儘是皮鞭痕迹，並有一點一點鮮紅血印，參差錯落，似滿天星斗一般。此系用煙簽燒紅戳傷的。翠鳳不禁慘然，道：「我交代耐，做生意末巴結點，耐勿聽我閑話，打到實概樣式！」金花道：「勿是呀。倪個無(女每)，勿比得該搭無(女每)，做生意勿巴結，生來要打；巴結仔，再要打囗。故歐就為仔一個客人，來仔三四埭，無(女每)說我巴結仔俚哉，難末打呀。」

翠鳳勃然怒道：「耐只嘴阿會說嗄？」金花道：「說個呀，就是阿姐教撥我個閑話。我說要我做生意末（要勿）打，打仔生意勿做哉！倪無(女每)為仔該聲閑話，索性關仔房門，喊郭孝婆相幫，撳牢仔榻床浪，一徑打到天亮；再要問我阿敢勿做生意？」翠鳳道：「問耐末，耐就說定歸勿做，讓俚哚打末哉（口宛）。」金花攢眉道：「故末阿姐哉，痛得來無那哈哉呀！再要說勿做呀，說匆來哉呀。」翠鳳冷笑道：「耐怕痛末，該應做官人家去做奶奶、小姐個呀，阿好做倌人？」

金鳳、珠鳳在傍「嗤」的失笑。金花羞得垂頭嘿坐。翠鳳又問道：「鴉片煙阿有嗄？」金花道：「鴉片煙有一缸來浪。碰著仔一點點，就苦煞個，陸里吃得落嗄！再聽見說，吃仔生鴉片煙，要迸斷仔肚腸死哚，阿要難過！」翠鳳伸兩指，著實指定金花，咬牙道：「耐個餡頭東西！」一句未終，卻頓住嘴不說了。

誰知這裡說話，黃二姐與趙家(女每)正在外間客堂中，並擺兩張方桌，把漿洗的被單鋪排縫紉。聽了翠鳳之言，黃二姐耐不住，特到房裡，笑向翠鳳道：「耐要拿自家本事，教撥俚末，今世勿成功個哉！耐去想，前月初十邊進去，就是諸十全個客人，姓陳個，吃仔一台酒，綳綳俚場面。到故歇一個多月，說有一個客人裝一擋乾濕，打三埭茶會。陸里曉得該個客人，倒是俚老相好，來里洋貨店裡櫃檯浪做生意，吃仔夜飯來末，總要到十二點鐘去。難末本家說仔閑話了，諸三姐趕得去打俚呀。」翠鳳道：「酒無撥末，局出仔幾個嗄？」黃二姐攤開兩掌，笑道：「通共一擋乾濕，陸里來個局嗄！」

翠鳳-地直跳起身，問金花道：「一個多月，做仔一塊洋錢生意，阿是教耐無(女每)去吃屎？」金花那裡敢回話。翠鳳連問幾聲，推起金花頭來道：「耐說囗，阿是教耐無(女每)去吃屎？耐倒再要尋開心做恩客。」黃二姐勸開翠鳳道：「耐去說俚做啥？」翠鳳氣的瞪目哆口，嚷道：「諸三姐個無用人，有氣力打俚末，打殺仔好哉（口宛）！擺來浪再要賠洋錢！」黃二姐跺腳道：「好哉呀！」說著，捺翠鳳坐下。

翠鳳隨手把桌子一拍，道：「趕俚出去，看見仔討氣！」這一拍太重了些，將一隻金鑲玳惠釧臂斷作三段。黃二姐咬了一聲，道：「故末陸里來個晦氣。」連忙丟個眼色與金鳳。金鳳遂摯著金花，要讓過對過房間。金花自覺沒臉，就要回去，黃二姐亦不更留。倒是金鳳多情，依依相送。送至庭前，可巧遇著羅子富在門口下轎。金花不欲見面，掩過一邊，等子富進去，才和金鳳作別，手扶娘姨，緩緩出兆榮里，從寶善街一直向東，歸至東棋盤街繪春堂間壁得仙堂。

請金花遭逢不幸，計較全無，但望諸三姐不來查問，苟且偷安而已。不料次日飯後，金花正在客堂中同幾個相幫笑罵為樂，突然郭孝婆摸索到門，招手喚金花。金花猛吃一嚇，慌的過去。郭孝婆道：「有兩個蠻蠻好個客人，我搭耐做個媒人，難未巴結點，阿曉得？」金花道：「客人來浪陸里嗄？」郭孝婆道：「哪，來哉。」金花抬頭看時，一個是清瘦後生；一個有須的，蹺著一隻腳。各穿一件雪青官紗長衫。金花迎進房間，請問尊姓。後生姓張，有須的說是姓周。金花皆不認識，郭孝婆也只認識張小村一個。外場送進乾濕，金花照例敬過，即向榻床燒鴉片煙。郭孝婆挨到張小村身傍，悄說道：「俚末是我外甥囡，耐阿好照應照應？隨便耐開消末哉。」小村點點頭。郭孝婆道：「阿要喊個檯面下去？」小村正色禁止。郭孝婆俄延一會，復道：「價末問聲耐朋友看，阿好？」小村反問郭孝婆道：「該個朋友耐阿認得？」郭孝婆搖搖頭。小村道：「周少和呀。」郭孝婆聽了，做嘴做臉，溜出外去。金花裝好一口煙，奉與周少和。少和沒有癮，先讓張小村。

小村見這諸金花面張、唱口、應酬，並無一端可取，但將鴉片煙暢吸一頓，仍與少和一淘踅出得仙堂，散步逍遙，無拘無束；立在四馬路口，看看往來馬車；隨意往華眾會樓上，泡一碗茶，以為消遣之計。

兩人方才坐定，忽見趙朴齋獨自一個接踵而來，也穿一件雪青官紗長衫，嘴邊銜著牙嘴香煙，鼻端架著墨晶眼鏡，紅光滿面，氣象不同，直上樓頭，東張西望。小村有心依附，舉手招呼。朴齋竟不理會，從後面煙間內團團兜轉，踅過前麵茶桌邊，始見張小村，即問：「阿看見施瑞生？」小村起身道：「瑞生勿曾來，耐阿尋俚？就該措等一歇哉呀。」

朴齋本待絕交，意欲於周少和面前誇耀體面，因而趁勢人座。小村喊堂倌再泡一碗。少和親去點根紙吹，授過水煙筒來。朴齋見少和一步一拐，問是為啥。少和道：「樓浪跌下來，跌壞個。」小村指朴齋向少和道：「倪一淘人，就挨著俚運氣最好。我同耐兩家頭，才是倒霉人：耐個腳跌壞仔，我個腳別脫仔。」

朴齋問吳松橋如何。小村道：「松橋也匆好，巡捕房裡關仔幾日天，剛剛放出來。俚個親生爺要搭俚借洋錢，噪仔一泡。幸虧外國人勿曾曉得，勿然生意也歇個哉。」少和道：「李鶴汀轉去仔阿出來？」小村道：「郭孝婆搭我說，要出來快哉。為俚阿叔生仔楊梅瘡，到上海來看，俚一淘來。」朴齋道：「耐陸里看見個郭孝婆？」小村道：「郭孝婆尋到我棧房裡，說是俚外甥囡來哚幺二浪，請我去看，就坎坎同少和去裝仔擋乾濕。」少和訝然道：「坎坎個就是郭孝婆，我倒勿認得，失敬得極哉！前年，我經手一樁官司，就辦個郭孝婆拐逃（口宛）。」小村恍然道：「怪勿得俚看見耐有點怕。」少和道：「啥勿怕嗄！故歇再要收俚長監，一張稟單好哉。」朴齋偶然別有會心，側首尋思，不復插嘴。少和、小村也就無言。

三人連飲五六開茶，日雲暮矣。趙朴齋料這施瑞生遊蹤無定，無處堪尋，遂向周少和、張小村說聲「再會」，離了華眾會，徑歸三馬路鼎豐里家中，回報妹子趙二寶，說是施瑞生尋勿著。二寶道：「明朝耐早點到俚屋裡去請。」朴齋道：「俚匆來末，請俚做啥？倪好客人多煞來浪。」二寶沉下臉道：「教耐請個客人末，耐就匆肯去，單會吃飽仔飯了白相，再有啥個用場圓」朴齋惶急，改口道：「我去，我去。我不過說說末哉。」二寶才回嗔斂怒。

其時，趙二寶時髦已甚，每晚碰和吃酒，不止一台。席間撒下的小碗，送在趙洪氏房裡，任憑趙朴齋雄啖大嚼，酣暢淋漓；吃到醉醺醺時，便倒下繩床，冥然罔覺，固自以為極樂世界矣。

這日，趙朴齋奉妹子之命，親往南市請施瑞生。瑞生並不在家，留張名片而已。朴齋暗想，此刻徑去覆命，必要說我不會幹事，不若且去王阿二家重聯舊好，豈不妙哉！比到了新街口，卻因前番曾遭橫逆，打破頭顱，故此格外謹慎。先至間壁，訪郭孝婆做個牽頭，預為退步。郭孝婆歡顏晉接，像天上吊下來一般，安置朴齋於後半間稍待，自去喚過王阿二來。

王阿二見是朴齋，眉花眼笑，扭捏而前，親親熱熱的叫聲「阿哥」，道：「房裡去囗。」朴齋道：「就該搭罷。」一面脫下青紗衫，掛在扌耆帳竹竿上。王阿二遂央郭孝婆關照老娘姨，一面推朴齋坐於床沿，自己爬在朴齋身上，勾住脖項說道：「我末一徑牽記煞耐，耐倒發仔財了想勿著我，倪勿成功個！」朴齋就勢兩手合抱，問道：「張先生阿來？」王阿二道：「耐再要說張先生，別腳哉呀！倪搭還欠十幾塊洋錢勿著杠。」

朴齋因歷述昨日小村之言。王阿二跳起來道：「俚有洋錢，倒去么二浪攀相好。我明朝去問聲俚看！」朴齋按住道：「耐去末（要勿）說起我囗！」王阿二道：「耐放心，勿關耐事。」

說著，老娘姨送過煙茶二事，仍回間壁看守空房。郭孝婆在外間聽兩人沒些聲息，知已入港，因恐他人再來打攪，親去門前看風哨探。好一會，忽然聽得後半間地板上歷歷碌碌，一陣腳聲，不解何事。進內看時，只見趙朴齋手取長衫要著，王阿二奪下不許，以致扭結做一處。郭孝婆勸道：「啥要緊嗄？」王阿二盛氣訴道：「我搭俚商量，阿好借十塊洋錢撥我，煙錢浪算末哉。俚回報仔我無撥，倒立起來就走。」朴齋求告道：「故歇我無撥來里（口宛）！停兩日，有仔末拿得來，阿好？」王阿二不依，道：「耐要停兩日末，長衫放來浪，拿仔十塊洋錢來拿。」朴齋跺腳道：「耐要我命哉，教我轉去說啥嗄？」

郭孝婆做好做歹，自願作保，要問朴齋定個日子。朴齋說是月底，郭孝婆道：「就是月底也無啥。不過，到仔月底，定歸要拿得來個囗。」王阿二給還長衫，亦著實囑道：「月底耐勿拿來末，我自家到耐鼎豐里來請耐去吃碗茶。」

朴齋連聲唯唯，脫身而逃；一路尋思，自悔自恨，卻又無可如何。歸至鼎豐里口，遠遠望見自家門首，停著兩乘官轎，拴著一匹白馬。踅進客堂，又有一個管家踞坐高椅，四名轎班列坐兩倍。

朴齋上樓，正待回話，卻值趙二寶陪客閑談，不敢驚動，只在帘子縫裡暗地張覷。兩位客人，惟認識一位是葛仲英，那一位不認識的，身材俊雅，舉止軒昂，覺得眼中不曾見過這等人物。仍即悄然下樓，踅出客堂，請那管家往後面帳房裡坐。探問起來，方知他主人是天下聞名、極富極貴的史三公子，祖籍金陵，出身翰苑，行年弱冠，別號天然。今為養痾起見，暫作滬上之游；質居大橋一所高大洋房，十分涼爽舊與二三知己，杯酒談心。但半月以來，尚未得一可意人兒承歡侍宴，未免辜負花晨月夕耳。朴齋聽說，極口奉承，不遺餘力。並問知這管家姓王，喚做小王，系三公子貼身伏侍掌管銀錢的。朴齋意欲得其歡心，茶煙點心絡繹不絕，小王果然大喜。

將近上燈時候，娘姨阿虎傳說，令相幫叫菜請客。朴齋得信，急去稟命母親趙洪氏，擬另叫四色葷碟，四道大菜，專請管家，趙洪氏無不依從。等到樓上坐席以後，帳房裡也擺將起來，奉小王上坐，朴齋在下相陪，吃得興緻飛揚，杯盤狼藉。

無如樓上這台酒僅請華鐵眉、朱藹人兩人，席間冷清清的，兼之這史三公子素性怯熱，不耐久坐，出局一散，賓主四人哄然出席，皆令轎班點燈，小王只得匆匆吃口乾飯，趨出立候。三公子送過三位，然後小王伺候三公子登轎，自己上馬，魚貫而去。

第三十七回終——